Swartland
Terug na hoofblad

Windlaaiers vir MRB

‘n Aansoek is verlede week by 'n raadsvergadering deur die Swartland Munisipaiteit se raad in terme van die beplanningsturbinaal goedgekeur vir die oprigting van 25 hernieubare energie strukture in die vorm van windlaaiers buite Moorreesburg.

Die drie windlaaiers teen die Klipheuwel-pad buite Durbanville, wat destyds as 'n toetslopie opgerig is, sal moontlik gerehabiliteer word en ook deel vorm van dié 25 windlaaiers.

Die aansoek deur die ontwikkelaar sluit die oprigting van die windlaaiers op gedeeltes van die plaas Zwartfontein, asook Biesjesfontein, Tontelberg en Hartebeesfontein in wat beskou word as ‘n hoë windspoed-sone.

Die oprigting van die windlaaiers, saam met ontwikkeling van bykomstige strukture en infrastruktuur, is onderhewig aan sekere voorwaardes wat onder meer insluit dat ‘n windlaaier nie hoër as 200m mag wees nie.

Die ontwikkelaar se aansoek gee gehoor aan al die relevante voorwaardes uiteengesit deur die departemente van omgewingsake en ontwikkelingsbeplanning, asook vervoer en openbare werke en water en sanitasie.

Die ontwikkeling is tans onderhewig aan Eskom wat die inisieerder van die hernieubare hulpbronne van energie is.

Die ontwikkelaar, Albertus Pool, kon nie voor druktyd uitbrei oor wanneer die ontwikkeling sal plaasvind nie, asook wat die kapasiteit van elke windlaaier sal wees en uiteindelik by die kragnetwork van Eskom bygevoeg sal word nie.

Lolita Hanekom gegroet

Lolita Hanekom van Moorreesburg wat in plaaslike spysenieringskringe beskou word as die koningin, is verlede Woensdag op die ouderdom van 89 jaar oorlede.

Lolita, die matriarg en stigter van die bekende restaurant –en onthaallokaal, Die Hut op die plaas Ebenhaezer op Moorreesburg, laat diep spore binne die gemeenskap van Moorreesburg agter. Sy was nie net ‘n wonderlike ma,vrou, ouma en oumagrootjie om op trots te wees nie, maar sal onthou word vir die baanbrekerwerk wat sy in die onthaal –en spysenieringsbedryf gedoen het.

Lolita, ‘n Engelse meisie wat aanvanklik van die stad af kom, het met Hendrik “Hondjies” Hanekom van die plaas, Ebenhaezer getrou.

Haar skoonma het boonop vir haar geleer om brood te bak toe sy plaas toe kom, vertel haar een dogter Pauline Schreuder. Net soos baie ander, het sy eers ‘n paar brode verbrand voor sy die perfekte brode gebak het. Sedertdien was daar geen keer aan haar bak –en kosmaakvernuf nie.

Hendrik was ‘n groot rugbyspeler op sy dag. Saam met rugbydanse- en funksies, is daar gewoonlik saam geëet .

Lolita bied toe aan om self vir een van die geleenthede kos te maak. Haar groot deurbraak het gekom met iemand wat gedurende dié geleentheid haar kos proe en daarop aangedring het dat sý die kos moet maak vir hul dogter se troue.

Sy het nie eers genoeg kastrole gehad om dié taak op daardie stadium te verrig nie, Toe dié boer se vrou wat boonop uit die stad uit kom en ma van vyf besluit het om vroeg in die 1970’s spyseniering te begin doen, het baie getwyfel, omdat die kontrei se vroue mos fluks is, vertel Pauline. “Dit was gewoonlik die VLV-vroue of lidmate van die kerk wat spyseniering behartig het.”

Lolita het vinnig-vinnig spyseniering tot ‘n nuwe vlak geneem en het so uitgebrei dat sy later haar dogters ook betrek het.  Vandag is haar drie dogters elkeen in die kos -en spysenieringsbedryf, asook haar skoondogters en van haar kleindogters.

In die sewentigerjare was spyseniering as ‘n beroep onbekend. Spyseniering was Lolita se lewe, maar ook haar loopbaan. Volgens haar kinders en die diegene in die bedryf, het sy spyseniering as ‘n beroep in die Wes-Kaap gevestig.

Inwoners van die Swartland wat ook in die spysenieringsbedryf is, praat vandag met groot lof van tannie Lolita. Almal in die bedryf het haar geken of al van haar gehoor. Sy word beskou as ‘n deurslaggewende figuur en ‘n rolmodel vir baie.

Lolita was tot 10 jaar gelede steeds by spyseniering betrokke. Sy het altyd gesorg dat daar kos is en was baie lief daarvoor om te onthaal, Sy laat haar vyf kinders en 10 kleinkinders agter. Sy was ook ‘n oumagrootjie vir agt agterkleinkinders wat binnekort tien sal wees.  ‘n Roudiens het gister in die NG Kerk op Moorreesburg plaasgevind.

Jacobs ontvang gesogte ere-toekenning vir FruitLips

Liebre Jacobs (27) van Fruitlips op Piketberg se naam verskyn op die Wes-Kaapse departement van landbou se ererol nádat sy onlangs ‘n toekenning tydens die Vroue Entrepreneurstoekenningseremonie ontvang  het.

Jacobs is vereer met die Toekenning van Ministerie: Jeug Entrepreneur. Haar onderneming, FruitLips wat derdegraadse vrugte aankoop en omskep in konfyte, souse en ander produkte, is genomineer deur die departement van landbou, bosbou en vissery se verteenvoordiger van die streek, Niel Zimry.

Die seremonie, aangebied deur die plaaslike departement van landbou, het in Stellenbosch plaasgevind waartydens hardwerkende vroue in dié sektor vereer is vir hul bydrae tot voedselsekuriteit en ‘n groeiende ekonomie.  Die kompetisie wat  in samewerking met die nasionale departement van landbou, bosbou en vissery aangebied word, streef daarna om erkenning te gee aan vroue se bydraes tot werkskepping, ekonomiese groei, die bekamping van armoede en die geleentheid om buitelandse valuta die land in te bring.

Liebre het op haar familieplaas, Achtervlei, Piket-Bo-Berg op Piketberg grootgeword en gematrikuleer aan die La Rocehlle Hoër Meisies Skool in die Paarl. Sy het `n driejaar diplomakursus by  die “The Aleit Acadamy” voltooi met haar hooffokus in onthaalbestuur. Die kursus deur die Instituut van Kulinêre Kunste (ICA) wat deel van haar studies gevorm het, het uitgestaan bo die res.  Nádat sy haar diploma ontvang het, het sy ‘n diploma by die Universiteit Stellenbosch se Besigheidsskool verwerf. Liebre het ook in projekbestuur gespesialiseer en reeds tóé planne vir FruitLips in November 2013 begin opstel.  Liebre bly vandag steeds op Piketberg saam met haar manMartijn, `n voedseltegnoloog van Nederland wat haar liefde vir kos deel.

FruitLips is vanaf 24 Februarie 2014 amptelik in besigheid. Die besigheid is deur Liebre gestig en kort daarná is twee vennote genader. Elouise Josephs is die kookguru van die konfyte en sy doen ook die ontwikkeling van al die nuwe produkte en Deidre Eigelaar is die finansiële ysterhand van FruitLips. Liebre as die derde vernoot is in beheer van aankope, bemarking, ersoneel en logistiek.

Sy was van kleins af lief vir kook en is self ‘n lekkerbek, vertel Liebre.

“My Ma het my Libi-lekkerbek gedoop as noemnaam.

"Ek het gasvryheid op skool gedoen, by ICA studeer en nou leef ek my liefde uit deur FruitLips.” Die drie vennote het `n geleentheid tussen boere en voedselverwerkingbedryf in hul streek raakgesien en verder gevat. “Daar was vrugte beskikbaar wat of te ryp, te klein, groot of groen is wat boere nie kon gebruik vir die uitvoermark nie. Hierdie vrugte het ons begin aankoop en `n produkt ontwikkel van die oorskot,” brei sy het. FruitLips het in 2014 21 verskillende produkte gemaak en verkoop en vandag is hulle al amper by sestig verskillende produkte wat gemaak en verkoop word. Hulle gebruik van appels tot beet. FruitLips het in 2014 reeds 11 personeellede gehad wat voltyds gewerk het. Daardie jaar is 100 000 potjies vervaardig. Vandag het hulle 17 permanente personeel in diens wat tot 260 000 potjies produseer.

Sy beskou die toekenning as een groot eer vir haarself en vir FruitLips. “Dit is`n groot mylpaal wat ons bereik het en ons word erken vir ons harde werk en uithouvermoë,” vertel sy.  Volgens Liebre was die afgelope vier jaar maar moeilik en harde klippe is deur die drie vennote gekou om tot hier te kom. “Hierdie toekening is net die begin vir FruitLips. Ons het nog soveel om te bied uit die landbousektor om die mark van konfyte, marmelades, bladjang en souse te benut tot die beste van ons vermoë vir al die lekkerbekke en “foodies” van Suid Afrika.”

Volgens Liebre het FruitLips `n paar kombinasie konfyet, souse en blatjang wat kliënte gaan laat skree vir nog.” Hulle beplan om elke jaar `n nuwe produk of twee onder hul eie reeks bekend te stel. “Hou ons facebook -en instragram-blad dop vir bekendstellings.” Ons is op die oomblik ook beskig met `n produk wat Suid-Afrika nie ken nie, maar ons glo die Suid Afrikaanse mark het dit nog. Dit is al wat ek daarvan kan se op die oomblik.

Volgens Alan Winde, plaaslike minister van ekonomiese geleenthede, gaan die departement elke jaar deur die inskrywings, identifiseer vroue, sien wat hulle doen en help hul besighede om te groei.  Die provinsiale wenners sal op 23 Augustus op nasionale vlak in Oos Londen teen mekaar meeding.

Oor die 300 000 mense in die Wes-Kaap verdien ‘n inkomste in die landboubedryf.

“Wanneer ons kyk na die land se probleem om werk vir jong mense te skep, is dít die sektor wat daarmee kan help. Daar is groot geleenthede vir jonger mense, veral jong vroue in die sektor,” voeg Winde by. Hy hoop dat die toekennings ander vroue sal aanspoor om hulself binne die sektor te ontwikkel.

Gawie Steyn Elektries lewer vir 48 jaar getroue diens

Gawie Steyn Elektries op Riebeek-Kasteel dien vir die afgelope 48 jaar getrou sy kliënte nádat dié onderneming amptelik sy deure middel 1970 deur patriarg Gawie Steyn (75) oopgemaak is.

Gawie snr het op sy ouers se plaas Soetendal buite Hermon grootgeword en op Riebeek-Kasteel skoolgegaan.

Sy hoërskooldae is by HTS Drostdy op Worcester deurgebring waar die fondasies vir ‘n loopbaan as ‘n elektrisiën neergelê is. Hy was die eerste van sowat ses leerlinge wat elektrisiteit as vak gehad het toe dit in 1957 deel van die skool geraak het.

Sy talent op die vakgebied het moontlik ook heelwat vroeër begin wys toe hy as ‘n jong kind sy pa se Harley-Davidson teen die pad waar die motorfiets gaan staan het, reggemaak het nádat hy gesien het die fout lê by ‘n elektriese draadjie.

Gawie snr se twee ouer broers het gaan boer, terwyl hy ná skool by ‘n firma op Worcester aangesluit het wat spesialiseer in elektries. Hy is van die begin af in die diepkant ingegooi, maar beskou dit as goud werd.

Hy het latere jare die vrugte daarvan gepluk. Dit was ‘n goeie leerskool, vertel hy.

Hy keer ná sewe jaar terug huistoe en werk vir ‘n verdere drie jaar by nóg ‘n firma op Wellington.

1970 Was ’n groot jaar vir Gawie snr.

Hy trou met sy vrou, Anita, begin aan motorwedrenne deel te neem én neem die groot stap om sy eie eleketriese besigheid, Gawie Steyn Elektries te begin.

Vandag is hy nie vir een oomblik spyt daaroor nie. Gawie snr het ‘n goeie begin gehad en ‘n groot kontrak losgeslaan met behuising kort ná die Bolandse aardbewing in 1969.

Dit was net hy, een werker en sy bakkie wat hy met behulp van ‘n lening van R5000 aangeskaf het, wat die groot werk alleen aangepak het.

Die meeste kliënte was destyds in die omgewing van Paarl en Wellington rond.

Daar is tot in Bophuthatswana werk uitgevoer. Toe Yzerfontein krag begin kry het, was Gawie snr  daar om die huise te bedraad.

Die werk het later te veel geraak.

Vandag is die meeste van hul kliënte beperk tot Riebeek-Vallei wat onder meer boerderye en wynkelders insluit, hoewel hulle ook kleiner werk doen vir jarelange kliënte.

Hy en sy vrou het drie seuns en ‘n dogter.

Die oudste seun, Gawie Steyn (48) jnr het in 1990 by die onderneming betrokke geraak.

Ná skool by HTS Drostdy, is hy verder deur sy pa opgelei en het in 1997 amptelik gekwalifiseer. Gawie jnr het aan die begin van vanjaar die luisels by sy pa oorgeneem.

Hy het reeds op skool geweet hy gaan sy pa se besigheid oorneem. Volgens Gawie snr was dit die regte tyd om afstand te doen, hoewel hy steeds betrokke is. Gawie jnr se een broer Callie werk ook as ‘n elektrisiën daar.

Die satisfaksie wanneer werk goed afgehandel is en wanneer jy deur kliënte bedank word, is seker een van die lekkerste aspekte van die bedryf, vertel Gawie snr.

Hul leuse waarvolgens hulle werk, is om altyd netheid en deeglikheid te handhaaf.

Volgens Gawie jnr is dit belangrik om altyd trots te wees op jou werk.

Die Steyns is nie net trots op hul werk nie, maar geniet dit. Om byvoorbeeld ‘n kontrole paneel te ontwerp en daarna te bedraad, is seker een van die lekkerste tye, vertel Gawie jnr opgewonde.

“Dit is lekker as ‘n kliënt sy vertroue in jou plaas,” voeg hy by.

Die geheim tot die sukses van Gawie Steyn Elektries is volgens Gawie jnr goeie gehalte werk.

Gawie snr voeg by dat die finansiële sy van die besigheid in orde moet wees.

Gawie jnr bedank al hulle kliënte van die afgelope byna half eeu vir hul getroue ondersteuning en vertroue.

Solo Studios bring weer kunstenaars na gemeenskap

Die Riebeekvallei het die afgelope week sy derde jaarlikse Solo Studios aangebied.

Dié kunsnaweek het oor drie jaar gegroei tot 'n baie gewilde geleentheid onder kunsliefhebbers waar besoekers van die vallei se top-kunstenaars en hul werk van nader kon leer ken.

Besoekers kon kuns, wyn en kos in verskillende variasies en kombinasies paar en die program het ook plaaslike musici die geleentheid gegee om hul talent na die verhoog te neem met die Solo Sessions wat by die Bruid, Die Pixie en die Vaalhond aangebied is.

By die opening van Solo Studios Vrydagaand het vanjar se beskermvrou Michelle Constant, bestuurshoof van Business and Arts South Africa, die geleentheid en organiseerders geprys vir hul werk en bydrae tot die kunste.

Solo Studios 2018 het verskeie hoogtepunte ingesluit, waaronder 'n dokumentêre film oor die werk van Emma Willemse, een van die valleise bekendste en suksesvolste kunstenaars.

Die film Displaced handel oor gedwonge verskuiwings en hoe Willemse se werk, deur eie ondervinding, dié kwessie aan die hand van verskeie kunsvorme aanspreek.

Ook haar man, Rudolph Willemse, het familiebande met mense wat jare gelede uit Die Bank by Carletonville moes trek weens die sinkgate.

Besoekers kon ook op begeleide staptoere deur kunskenners die uitstallings van 16 kunstenaars besoek en die kunstenaars in hul eie studios ontmoet.

Die 16 wie se werk op die roetes besigtig kon word, is Leila Fanner, Raymond Oberholzer, Ivan Kirstein, Louisa Gerryts, Gordon Williams, Solly Smook, Jenny Parsons, Claudia Gurwitz, Antoinette von Saurma, Tamlin Blake, André van Vuuren, Tanya Majó, Riaan van Zyl, Greta McMahon, Wiehan de Jager en Emma Willemse.

Solo Studios, wat deur Klaus Piprek gereel word, het vanjaar ook 'n eksklusiewe wynversameling, "Force Majeure", met drie wyne van Stompie Meyer geloods.

Piprek het gaste by die opening daarop gewys dat dit die derde jaar is dat die geleentheidf sonder 'n groot korporatiewe borgskap aangebied word en Nino Antonio Rivera bedank vir sy finansiële ondersteuning.

Kunswerke van tientalle kunstenaars is ook by vier gallerye - The Royal Gallery, The Gallery, RK Contemporary en Pictorex Print Studio - uitgestal.

Die plaaslike jong orkes, Sund Korls, was een van die gewilde nommers op die verhoog by die Solo Sessions . Hulle is van links Sebastian Kirstein, Mariana Del Carmen, Daniel Puchert en Jay Gordon-Turner.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.