Terug na hoofblad
Wellington

Passiespele op die planke gebring

Fassiliteerders en vrywilligers by

Ma’s vir Wellington het ‘n Paasspel vir die kinders opgevoer.

Rosa Whitehead het die verhaal aan die kinders verduidelik terwyl die opvoering plaasgevind het.

•Jaomi Zeeman

Die kinders by Ma’s-vir-Wellington volg elke week ‘n baie leersame, interessante program waar hulle lewensvaardighede aanleer en liefde ervaar terwyl hulle speel-speel gereed gemaak word vir skool.

Die afgelope week kon hul ook meer oor die betekenis en verhaal van Paasfees leer.

Op Dinsdag 16 April het die groepleiers en die “tannie-mammas” wat vrywillige werk by die Ma’s vir Wellington organisasie doen ‘n spesiale Paasspel vir die kinders opgevoer.  Met hierdie opvoering het hulle die Christelike Paasverhaal uitgebeeld en die betekenis daarvan aan die kinders verduidelik.

Die energieke vroue het, met gepaste kostuums en ‘n spesiaal vooraf-geskryfde teks wat hul voorberei het, die kinders met groot oë en oop monde vasgenael na die uitbeelding van die Paasverhaal laat kyk en luister.

Ma’s vir Wellington bedien ongeveer 153 kinders en altesaam 57 vroue help elke week vrywillig as “tannie-mammas” by die organisasie.

Op Dinsdae en Donderdae doen hulle kinderbediening.  Die ander drie weeksdae word ‘n spesiale, geakkrediteerde program in Vroeë Kinderontwikkeling gevolg.

Hulle is ‘n geregistreerde nie-winsgewende organisasie wat allermins ‘n dagsorgsentrum is wat kinders oppas.

Hulle het ‘n gestruktureerde program waarmee hul kinders wil bemagtig, liefde wil gee en hoop wil bring waar omstandighede soms maar troebel lyk.

Die kinders kry ook ontbyt en middagete by Ma’s vir Wellington.

Die organisasie dryf ook talle projekte waarmee hulle die omstandighede en lewe van die kinders probeer verbeter.

Een van hierdie projekte behels byvoorbeeld dat daar gepoog word om vir elke kind in die winter van ‘n lekker warm sweetpak te voorsien.

Om hierdie rede maak die organisasie baie op skenkings en donasies uit die gemeenskap staat en is hulle baie dankbaar vir die oop hande en harte van ons mense wat hul werk moontlik maak.

Belangstellendes kan Ma’s-vir-Wellington by 083 459 5961 of admin.mvw@telkomsa.net kontak.

Meer inligting is ook op hul webtuiste, http://masvirwellington.co.za/, beskikbaar.

Jo Black se voete loop na Wellington

Die musikant Jo Black se naam is die afgelope tyd op almal se lippe.  Hierdie bekende sanger en liedjieskrywer het die harte van Suid-Afrikaners met sy talle sielvolle liedjies gewen.  Hy het vinnig bekendheid en gewildheid met liedjies soos Skepe, Bring die hoop weer terug en Nooit alleen verwerf.  Sy meer onlangse treffer, Voel jy die genade, is reeds baie gewild.  Jo het ook in 2018 altesaam sewe Ghoema-toekennings ingepalm.  Hy het boonop ‘n goeie, oop hart en het ‘n “Be that guy/girl”-inisiatief begin waarmee hy kinders wil help om ‘n positiewe houding te bou.

Ten spyte van sy baie besige skedule en die groot aanvraag na sy vertonings, is hierdie groot kunstenaar binnekort op pad Wellington toe.  Jo sal op 26 Julie by die Bergkroon Teater buite Wellington optree.

Volgens Lucy Rossouw, een van die organiseerders van die geleentheid, is Jo se besoek aan Wellington ‘n besonderse een.

“Wellington is lanklaas deur ‘n groot kunstenaar besoek.  Die Sarie-tydskrif se 2018 Desember-uitgawe se voorblad en artikel oor Jo Black was ons inspirasie.  Hy is tans ‘n baie gewilde kunstenaar vir oud en jonk.  Almal wil hom graag sien.  Hy sou verlede jaar die Paarl besoek, maar as gevolg van sy nekoperasie, moes hy die vertoning kanselleer.  Hy was nie weer in die Boland nie en dit gaan sy énigste vertoning in die Boland wees hierdie jaar,” sê sy.

Die aand beloof om ‘n baie spesiale geleentheid te wees.

“Ons beplan ‘n  fantastiese aand vir die hele Boland.  Mense kan die saamkuier kom geniet en Jo Black in lewende lywe sien en hoor hoe hy al sy bekende en nuwe treffers sing.  Die hekke sal al vanaf vyfuur oop wees, sodat alle gaste voor die tyd lekker  kan kom saamkuier en eet,” sê Lucy.

Die bekende Wellingtonse wynmaker, koskenner en kok, Bertus Fourie, sal onder sy handelsnaam, Asador, vir heerlike kos, koffie en drinkgoed sorg.

“Omdat daar geen eie eet- en drinkgoed op die perseel toegelaat sal word nie, is Bertus se bydrae tot die aand iets waarna mense kan uitsien.  Daar sal kaartfasiliteite beskikbaar wees en die hele gesin, oud en jonk, is welkom.  Die vertoning sal om aguur begin,” vertel Lucy.

Die opbrengste van die vertoning gaan boonop in ons dorp teruggeploeg word, omdat dit as ‘n fondsinsamelingsgeleentheid ten bate van Hugenote Laerskool aangebied word.

“Belangstellendes kan kaartjies vir die vertoning by Hugenote Laerskool of quicket, by www.quicketco.za, koop.  Kaartjies wat vooraf gekoop word sal natuurlik teleurstelling voorkom.  Mense kan ook navrae aan Carine by 021-873 1362 of functions@hugprim.co.za rig.  Ons sien regtig uit na ‘n wonderlike geleentheid waar Wellingtonners die room van ons kunstenaars kan geniet,” sê Lucy.

Plaaslike toerisme ondersteun outisme

Op die foto is Desire Koopman (links) en Wilandre Johnson (regs) wat ‘n blou lap om die boom gebind het.

April is Outisme Bewustheidsmaand.  Die Plaaslike Drakenstein Toerisme Vereniging (DLTA) is trotse ondersteuners van hierdie inisiatief.

Ter viering van hierdie spesiale maand en die bewusmaking wat hiermee rondom outisme gedoen word, bind ondersteuners van die inisiatief blou materiaal of linte om pale of bome.  Verteenwoordigers van die DLTA het ter ondersteuning van Outisme Bewustheidsmaand blou materiaal om die boom voor een van die oudste plaaslike historiese geboue gebind.  “De Woning” in die Paarl se Hoofstraat huisves ook die Drakenstein se argiewe. Die Blou Lint Projek is ‘n inisiatief van die Boland Skool vir outisme, in samewerking met die Drakenstein se Sakekamer om bewusmaking vir Outisme te doen.  Outisme is ‘n neuro-ontwikkelingsafwyking wat deur verswakte sosiale interaksie, sowel as verbale en nie-verbale kommunikasievaardighede gekenmerk word.  Die voorkoms van kinders wat met outisme gediagnoseer word, is tans 1 uit elke 88 in die VSA, met Suid-Afrikaanse statistieke wat op 1 uit 158 staan.

VLV vereer Ligstraal-skool by konferensie

•Jaomi Zeeman

Die plaaslike VLV-tak het op Donderdag 18 April ‘n heerlike, leersame vergadering in die saal van die Wellington-Noord gemeente gehou.  Daar was oudergewoonte ‘n marktafel vol tuisgemaakte en vars produkte waar almal ‘n paar winskopies kon bekom en die dames het gretig kaartjies vir ‘n groot bederfgeskenk aan die lootjiekompetisie deelgeneem.

Tydens die opening van die geleentheid is die VLV se tema van die jaar, naamlik “Laat ‘n voetspoor na”, onder die loep geneem.

Op die vooraand van Paasfees is hierdie tema ook aan die geestelike voetspoor wat mense nalaat gekoppel.

Irma Mentoor, skoolhoof van die Ligstraalskool in die Paarl, het as een van die sprekers by die vergadering opgetree.  ‘n Groep van hierdie skool se leerders het die gaste ook met ‘n dansitem vermaak, terwyl een van hul leerders ‘n pragtige sangitem gelewer het.  Met hierdie vertoning wou hulle die klem lê op hul leerders se potensiaal en vaardighede, eerder as hul tekortkominge.

Volgens Irma, wat al sedert 1990 skoolhoof by die Ligstraal-skool is, is dit een van die skool se doelstellings om hul skool se aktiwiteite en werk in die gemeenskap bekend te maak om sodoende ‘n beter begrip vir hul leerders te bewerkstellig en persepsies te verander.

“Ons het nie ‘mal’ kinders in ons skool nie.  Ons het kinders met potensiaal en talent,” het sy beklemtoon.

Irma het meer oor die skool se agtergrond, totstandkoming en werksaamhede vertel.

“Ligstraal is ‘n skool vir kinders met spesiale behoeftes.  Hulle is verstandelik gestrem en het ook soms ‘n fisiese gebrek.

‘n Mens moet baie liefde en geduld hê om met hierdie kinders te werk en dít het ons in oorvloed by Ligstraal,” het sy gesê.

Die skool het sy ontstaan in 1986 met slegs 13 leerders in ‘n skoolsaal gehad.  Die goedtoegeruste gebou en perseel wat hulle tans gebruik, is oorkant Boland Park geleë.  Volgens Irma moes die ouers en skool 10% van die koste met die bou van die skool, sélf insamel.

“As ‘n mens self vir iets werk, waardeer jy dit meer.  Daar is ‘n warmte in ons skool.  Dit is ‘n veilige, warm, liefdevolle plek.

Ons bedien die Paarl, Franschhoek, Simondium, Wellington en al die omliggende areas.  Wellington is een van ons grootste bedieningsgebiede en ons het ‘n waglys van meer as 30.  Daar is tans 270 leerders in ons skool,” het Irma gesê, en ook na die busdiens wat kinders in al hierdie gebiede na die skool vervoer, verwys.

Volgens haar volg hulle ‘n kurrikulum wat basiese skryf- en syfervaardighede insluit.  Hulle fokus ook op praktiese vakke waar leerders vaardighede in houtwerk, naaldwerk, kookkuns, gesondheidsorg en rekenaars aanleer.

“Ons wil die kinders holisties grootmaak en bemagtig,” het sy verduidelik.

Hulle bied ook verskeie sportsoorte by die skool aan en hul leerders het al baie goed in talle sportsoorte presteer.

“Ons het onder andere al Protea-tafeltennisspelers opgelewer wat ons land internasionaal verteenwoordig het,” het Irma trots laat hoor.

Buiten sport, is daar ook verskeie kultuuraktiwiteite wat by die skool aangebied word.  Hulle het ‘n marimba-orkes en hul leerders neem elke jaar aan die eisteddfod deel.

“95% van ons ouers kry SASSA-toelaes.  Dit bring mee dat ons baie uitdagings het wat ons die hoof moet bied en dat ons baie fondsinsamelings moet hou.  Dit is altyd lekker as die gemeenskap inkoop in wat ons aanpak en ons ondersteun.

Sonder hierdie ondersteuning sal ons nie geleenthede vir ons kinders kan skep nie,” het Irma gesê.

Die VLV het die kinders wat by die geleentheid opgetree het met geskenkpakkies bedank en ook ‘n klomp klere en ander benodigdhede aan die skool geskenk.  Een van die VLV-lede, Evelina Gerber, het ‘n praatjie oor die hergebruik en herwinning van plastiek gelewer.  Volgens haar sluit so ‘n inisiatief by die VLV se “Voetspoor”-tema, sowel as by die VLV Wes-Kaap se “Plastiek, ons vyand” veldtog aan.  Sy het na die besoedeling as gevolg van plastiek, die afval wat dit veroorsaak en die feit dat dit onafbreekbaar is, verwys.

Sy het ook praktiese wenke ten opsigte van die hergebruik en herwinning van plastiek gegee, sowel as ‘n demonstrasie van hoe ‘n mens ‘n eko-baksteen uit ‘n leë 2 liter plastiekbottel wat met afvalplastiek gevul word kan maak, gedoen.

Die Wellington VLV-tak het uitstekend by die afgelope VLV-konferensie presteer.  Juanita Loubser, voorsitter van Wellington se VLV,

het terugvoer hieroor gegee.  Volgens haar het die plaaslike tak uitstekend met hul kompetisie-inskrywings by die konferensie gevaar.

Dalene Buckle het ‘n eerste plek in die afdeling vir Beeldende Kunste verower, terwyl Gerda Smit ‘n derde plek in die afdeling vir ingemaakte produkte losgekook het.  Susan Hodgin het ‘n eerste plek in blommerangskikking gewen, Susan Laubscher ‘n eerste plek in Woordkuns en Elsabe du Plessis het met ‘n tweede plek in Woordkuns weggestap.  Karin Barnard het ‘n tweede plek in die Naaldwerkafdeling losgeslaan.

Die Wellington-tak het ook algeheel derde in die Naaldwerk-afdeling geëindig en die Kunste en Handvlyt-beker ingepalm.

Hulle het boonop die beker vir die tak met die meeste punte verower en die Presidentsbeker vir die Tip-top tak gewen.

“Ons is baie trots op al hierdie prestasies.  Dit is te danke aan al ons lede wat aktief betrokke is.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.