Terug na hoofblad
Wellington

Hugenote Hoër in Hollywood omskep

•Jaomi Zeeman

Talle Wellingtonners het die afgelope tyd interessante bedrywighede rondom Hugenote Hoërskool opgemerk.

“AM”-borde is op verskeie plekke op lamppale aangebring en ‘n mens moet soms iewers ‘n bietjie in ‘n straat naby die skool wag, sodat tegnici en mense met groot skerms en kameras hul ding kan doen voordat verkeer weer kan verby beweeg.

Poeierkwaste, lang lense en talle bekende gesigte is die afgelope week ‘n algemene gesig op en rondom die skoolterrein.

Die rede vir hierdie interessante bedrywighede is die verfilming van die “Alles Malan”-televisiereeks wat tans in volle swang is.

Wellington is die tuiste van ‘n hele televisiespan, talle bekende akteurs en die produksiespan van Red Letter Day Pictures wat die reeks vir KykNet vervaardig.

Ons dorp dien as die agtergrond vir die Malan-familie se doen en late en talle skoolkinders en plaaslike mense word ook as ekstras en byspelers in die reeks gebruik.

Behalwe vir die feit dat ‘n hele paar van Hugenote Hoërskool se leerders as karakters in die reeks gebruik word, is die skool en Boland Stadion ook ‘n groot deel van die agtergrond waarteen die storie afspeel.

Twee van die hoofkarakters in die storie is hoërskoolleerders en die rolle van hul vriende word almal deur leerders van Hugenote vertolk.  ‘n Paar van die skool se onderwysers sal ook ‘n verskyning in die reeks maak.

Die verfilming van die reeks het reeds in Desember 2018 begin en in Februarie hierdie jaar hervat.

Sedert die verfilming hierdie maand begin het, is Hugenote Hoërskool kompleet in ‘n klein-Hollywood omskep.

Plaaslike ouers en leerders dien as agtergrond vir die Malans se doen en late.  Sekere tonele het spesifiek ouers as toeskouers en ondersteuners tydens ‘n sportbyeenkoms in die reeks vereis.  Talle ouers het gewillig nader gestaan om die pawiljoen vol te sit en deel van die opwinding te wees.

Bekende akteurs soos Elsabé Daneel, Albert Maritz, Marius Weyers, Nadia Valvekens en Ivan Zimmerman is die afgelope tyd algemene gesigte op die skoolterrein.

Die reeks sal vanaf die middel van 2019 op kykNET te sien wees.

Veelsydige Elzahn oes talle Boland-medaljes in

•Jaomi Zeeman

Elzahn Nel is ‘n graad 7-leerder aan Hugo Rust Laerskool.  Hierdie veelsydige sportvrou het tydens die Boland Atletiekbyeenkoms wat op Saterdag 16 Februarie by Dal Josaphat plaasgevind het medaljes in al die items waaraan sy deelgeneem het, ingeoes.

Sy is ook die Bolandkampioen in twee van haar items.

Volgens Elzahn was sy nog altyd lief vir sport.  Haar ellelange lys sportprestasies getuig hiervan.  Sy neem al sedert graad 1 aan verskeie sportsoorte deel en presteer in byna alles wat sy aanpak.

Elzahn se naam pryk agter talle skoolrekords en sy het elke jaar die streek-atletiekspanne verteenwoordig.  Sy was ook al twee agtereenvolgende jare die Victrix Ludorum by haar skool en is in 2018 boonop as die Sportvrou van die Jaar aangewys.

Dit is veral in hekkies, gewigstoot en diskus dat sy op die atletiekbaan uitblink.  Sy het die Boland Atletiekspan verlede jaar in twee hekkie-items, sowel as diskus en gewigstoot verteenwoordig.  Sy is ook in 2018 in die Wes-Kaap Atletiekspan opgeneem en het hulle by die Suid-Afrkaanse Atletiekkampioenskappe gaan verteenwoordig.

Elzahn het hierdie jaar op haar vorige prestasies voortgebou deur as die Bolandkampioen in die 200m hekkies, sowel as die 75m hekkies oor die wenstreep te nael.  Sy verwerf ook ‘n silwermedalje in beide gewigstoot en diskus en verwerf dus vier keer Bolandkleure.

Oor twee weke sal sy aan die Wes-Kaap Ateltiekkampioenskappe deelneem.

Buiten haar liefde vir atletiek, het Elzahn al aan talle ander sportsoorte deelgeneem waarin sy ook uitstekend presteer het.  Sy het haar skool se swemspan by talle byeenkomste en gala’s verteenwoordig en van haar swemrekords staan nog steeds by die skool.

“Ek moes ongelukkig ophou met swem aangesien die oefentye met my atletiek oorvleuel,” sê sy.

Elzahn het ook al haar skool op die krieketveld verteenwoordig, is sedert graad 1 ‘n A-span hokkiespeler vir Hugo Rust en sy speel ook sedert o/9 vir die o/11A-tennisspan en sedert 2016 vir die o/13A-tennisspan van haar skool.  Sy is boonop ‘n kranige netbalspeler.  Sy het sedert graad 1 elke jaar vir haar skool se A-span op die netbalbaan uitgedraf en het in 2017 die Wynland-netbalspan by die Streektoernooi verteenwoordig.  In 2018 verwerf sy Wes-Kaap kleure in netbal en gaan neem aan die SA’s in Boksburg deel, waar haar span ‘n algehele 7de plek in die land losspeel.

Om aan soveel sportsoorte deel te neem en boonop daarin te presteer, verg ongelooflike deursettingsvermoë en harde werk.  Elzahn het ‘n vol oefenprogram wat kophou verg.

“Op Maandae en Woensdae oefen ek vir ‘n uur en ‘n half gewigstoot en diskus.  Dinsdae en Donderdae oefen ek weer vir meer as ‘n uur hekkies.  Met die Wes-Kaap byeenkoms om die draai oefen ons selfs Saterdae en Sondae ook,” sê sy.

Sy het egter geleer hoe om haar tyd goed te bestuur.

“Ek doen opsommings waar ek kan en moet oor naweke voor eksamens en toetse wat in die week geskryf word, leer,” vertel sy.

Hierdie nederige, spontane kind wil net haar talente na die beste van haar vermoë ontgin.

“Ek hoop ek kan eendag ons land in atletiek of netbal verteenwoordig.  Ek besef dat ‘n mens gebalanseerd moet wees en daarom neem ek ook graag aan kultuuraktiwiteite deel.  Ek het al ‘n hoofrol in ons konsert gespeel en doen monoloë, klavier en sang by die eisteddfod,” sê Elzahn.

Haar naam is self al op Unisa se ererol aangebring vir haar prestasie in ‘n musiekeksamen en sy het ook al die Kultuurtrofee by Hugo Rust ingepalm.  Sy is boonop ‘n hardwerkende slimkop wat onder die Top 10 vir akademie in haar graad is.

Intussen geniet sy dit om gewone “graad 7-dinge” te doen.

“Ek hou daarvan om te lees en saam met my vriende te kuier.  En natuurlik van shopping - veral vir sportklere en -skoene,” lag sy.

Nuwe koolstofaanleg langs Bergrivier beplan

‘n Publieke deelnameproses is tans onderweg vir die voorgestelde ontwikkeling van ‘n koolstofiseringsaanleg teen die Bergrivier.

Die voorgestelde ontwikkeling sluit die daarstelling van ‘n karbonariseringsaanleg en gepaardgaande infrastruktuur op die plaas, Plaasgrens in.

Die perseel is tussen Wellington en Hermon langs die Bergrivier,  sowat 15km buite Riebeek-Kasteel geleë.

Die ontwikkeling val ook onder die jurisdiksie van Swartland Munisipaliteit.

Die aansoeker, die Toronto Groep, is in 2014 gestig met die fokus om die voorstander in die produksie van koolstof en kool in die bedryf te wees.

Die Toronto Groep is afkomstig vanuit die ingenieurs- en mynmaatskappy, Toronto Engineering and Mining Supplies, wat in plantegroeibestuur in die Wes-Kaap spesialiseer, veral die uitroei van indringer- en uitheemse plante.

Direkteure van die maatskappy het ‘n leemte in die mark gesien vir inisiatiewe wat waarde toevoeg tot dié biomasse gegenereer vanuit die indringer uitheemse spesies wat van die rivierbeddings en oewers verwyder word.

Die verwydering van die uitheemse plantegroeispesies langs die rivieroewers vorm deel van die Working for Water-programme, asook van onder die Eskom kraglyne, waarvoor Toronto Engineering and Mining Supplies langtermyn-kontrakte het.

Dié vrae het gelei tot gefokusde navorsing en ontwikkeling rondom die voordele van die biomasse.

In die proses is Toronto Groep blootgestel aan verskeie tegnologie vanuit Nederland, geproduseer deur die maatskappy, Clean Fuels.

Dié tegnologie is daartoe in staat om steenkool, plofstofolie en sintetiese gas te genereer, terwyl die proses wat gebruik word, skadelike lugvrystellings uitskakel.

Die hoofproduk wat deur die aanleg produseer sal word, is steenkool.

Die doel is om 10 000 ton steenkool per jaar te produseer deur die hout wat van die verwyderde indringer plantspesies in die omgewing van die aanleg afkomstig is, te gebruik.

Bykomende produkte soos elektrisiteit, sal deur Organic Rankine Cycle-kragopwekkers geproduseer word.

Plofstofolie sal op sy beurt in die tweede fase van die ontwikkeling geproduseer word sodra die aanleg tot sy volle kapasiteit ontwikkel is.

Die ge-oesde indringerhout biomassa-materiaal word uiteindelik in hoë kwaliteit steenkool omskep.

Die aanleg wat deur die Toronto Groep ontwikkel sal word, sal in twee fases plaasvind en benodig ‘n oppervlak van ongeveer vier hektaar groot wat op drie terrasse gebou sal wees.

Die aanleg is ook bereikbaar vanaf die R45. Die terrasse sal verder ook elk bo die 1:100 jaar vloedlyn van die Bergrivier- en Olifantsrivier geleë wees.

Die karbonisasie-aanleg sal in twee staalstrukture van 1520²m gehuisves word, elk op die onderste deel van die terrasse. Die verwante infrastruktuur sal voorlopig bestaan uit ‘n wateropgaartenk, bogrondse dieseltenk, ‘n werkswinkel, ‘n pomphuis, ‘n stormwaterretensiedam en ‘n filtrasiebed geleë tussen die geboue en die Doringrivier.

Die aanleg sal ook veilig omhein wees vir sekuriteitsdoeleindes.

Die ondergrondse gekompakteerde rioolaanleg word ook voorgestel om die nodige riooldienste vir die ontwikkeling te verskaf.

Die voorgestelde ontwikkeling se stormwaternetwerk sal bestaan uit afvoervore wat geskep sal word om die stormwater aan die bokant van die aanleg na die Doringrivier te lei deur middel van ‘n grasblokvoor.

Beide vore sal via ‘n rietbed en die retensiedam oorloop.

Die stormwater sal dus na die rietbed en die retensiedam gelei word wat weer in die rivier sal vloei sodra die dam vol is.

Belangstellendes en geaffekteerde partye is welkom om te registreer en kommentaar te lewer deur ‘n e-pos aan die omgewingskonsultante, Doug Jeffery Environmental Consultants by adel@dougjeff.co.za te stuur. Alle kommentaar moet voor 4 Maart gestuur word.

Alleensaam-uitstalling by Breytenbach-galery geopen

Die openingspreker, Nanette Ranger, saam met die kunstenaar Jana Muller en Anne-Ghrett Erasmus, kurator van die Breytenbach-galery.

Die kunstenaar Jana Muller se uitstalling, Alleensaam, het op Saterdag 16 Februarie by die Breytenbach-galery geopen.

Hierdie uitstalling wat uit Jana se kunswerke uit gemengde media bestaan, sluit ook fotografie van haar oorlede man, Hilgard, in.

Hilgard was ‘n jong ortopediese chirurg van die Paarl wat in 2017 selfdood gepleeg het.  Jana, ‘n fisioterapeut, se kunswerke saam met dié van haar ontslape man, sorg vir ‘n treffende uitstalling.

Nanette Ranger was die openingspreker tydens die geleentheid.  Sy het na beide Jana en Hilgard se fyn aanvoeling vir kuns en die fynere dinge in die lewe verwys.

“Hilgard het die vermoë gehad om die mooi rondom hom presies soos wat hy dit gesien het weer te gee - sonder enige versteekte agenda.  Jana, aan die ander kant, vind haar inspirasie in die eensaamheid van die lewe en druk dít uit wat moeilik is om te verwoord.  Met Hilgard wat die mooi uitbeeld, en Jana die onderbuik daarvan, vind hul visie ‘n balans wat beide mooi is en ‘n mens aanraak. ,” het Nanette gesê.

Jana is reeds sedert 2014 ‘n student van Nanette.  Volgens Nanette was dit van die begin af duidelik dat Jana ‘n uiters talentvolle student is wat elke projek met entoesiasme en ‘n diepe intellektuele begrip van die wêreld aangepak het.

“Jana het nooit iets aanvaar of op ‘n oppervlakkige manier geïnterpreteer nie, maar altyd dieper gedelf om die hoe, wat en waarom te probeer verstaan.  Sy het al met ‘n groot verskeidenheid materiale gewerk en baie verskillende tegnieke beoefen.

Haar oorgang tot drukwerk het uit haar gewaarwording van dinge buite die sfeer van realisme ontstaan.  Sy omhels die onverwagse,” het Nanette oor Jana as kunstenaar gesê.

Jana se veelsydigheid in die gebruik van tegnieke en ontginning van die eindelose moontlikhede van kreatiwiteit is in haar kunswerke sigbaar.

Nadat Hilgard dood is, het Nanette Jana aangemoedig om steeds haar kunsklasse by te woon.  Dit is tydens hierdie tyd dat Jana die towerkrag van keramiekkuns ontdek het.

“Wetenskaplike navorsing het bewys dat mense wat aan post-traumatiese stres ly, sukkel om dié deel van hul brein wat met verbale kommunikasie te doen het, te gebruik.  In ‘n poging om sin te maak van haar hartseer, het Jana met klei begin eksperimenteer.  Hieruit is ‘n reeks keramiek-portrette gebore wat ‘n verskeidenheid emosies uitbeeld.  Terwyl sy met klei gewerk het, het sy intuïtief, eerder as kognitief te werk gegaan en meer op gevoel as op sig staatgemaak,” het Nanette verduidelik.

Op hierdie manier kon Jana ‘n merkwaardige ooreenkoms met Hilgard, sowel as haar eie gesig skep.

In een van Hilgard se joernale het hy die volgende geskryf:  “Ek smag na skoonheid.  Om dit te sien, te vind en vas te vang.”

Sy fotografie wat as deel van die uitstalling te sien is, getuig hiervan.

“Met hierdie versameling van sy werk, laat hy ons met die groot geskenk van onsterflikheid.  Want kuns ís, dit wás nooit.

Ons praat van ‘n kunswerk in die teenwoordige tyd omdat dit altyd in die nou ervaar word.  Al het die kunstenaar aanbeweeg, sal sy gedagtes en kreatiewe impulse vir altyd in die teenwoordige tyd bly voortbestaan,” het Nanette afgesluit.

Jana het tydens haar spreekbeurt almal wat haar in die proses ondersteun het, bedank.

“Hilgard was braaf genoeg om te skep.  Hy was ‘n buitengewone mens wat voluit geleef het en lief was vir die lewe,” het sy gesê.

Die uitstalling is tot 7 Maart in die Breytenbach-galery te sien.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.