Terug na hoofblad
Wellington

Melvin hang possak op ná 46 jaar diens

•Jaomi Zeeman

“Wat is mevrou se van?” vra Melvin Erasmus.  Nadat hy die antwoord gehoor het, kyk hy vir ‘n paar sekondes deur die poskantoor se venster.  Dan kyk hy my vas in die oë, terwyl hy my presiese adres, die woonbuurt waar ek woon, sowel as ‘n beskrywing van my huis vir my gee.

Melvin is nie ‘n fortuinverteller nie.  Hy is ook nie heldersiende of met die helm gebore nie.  Sy spesiale kennis van bykans al Wellington se inwoners, hul adresse, wonings en selfs rygoed het hy die afgelope 46 jaar as posman, op sy fiets deur Wellington se strate, opgedoen.

Ná 46 jaar as plaaslike posman, tree Melvin aan die einde van April af.

“Ek word 63 in September.  Ek dink na 46 jaar se diens, het ek nou eers genoeg pos afgelewer,” lag hy.

Volgens Edward Pieterse, die depot-toesighouer en kontroleerder by Wellington se poskantoor, is Melvin volgens hul rekords op 1 Mei 1973 by Wellington se poskantoor as posman aangestel.  Edward werk al sedert 2006 saam met Melvin.

“Melvin het al in so te sê al die wyke in Wellington pos afgelewer.  Soos wat hy ouer geword het, het ons hom meer in die Sentrale wyk laat aflewer.  As daar egter nood is, help hy in die ander wyke ook uit,” sê Edward.

Hy praat met groot lof van Melvin se werksetiek en betroubaarheid.

“Ons val elke oggend sewe-uur in by die Poskantoor en Melvin is nooit laat nie en getrou elke dag op sy pos.  Hy is te erg oor sy werk om weg te bly.  Hy moet omtrent doodsiek wees voordat hy by die huis sal bly,” vertel Edward.

Volgens Melvin het hy as jongman besluit om ‘n posman te word, omdat hy graag in sy oupa se voetspore wou volg.

“My oupa was ‘n posman in die Paarl.  Hy was pligsgetrou, ‘n positiewe werker en trots op wat hy gedoen het.  Ek wou graag soos my oupa wees,” sê Melvin. Volgens Edward is Melvin beslis ‘n aanwins by die poskantoor.

“Hy is altyd bereid om ekstra werk te doen en pak enigiets wat van hom verwag word aan sonder skroom of sonder om te kla,” getuig hy.

Alhoewel Melvin amper 63 jaar oud is, is hy baie gesond en buitengewoon fiks.

“Kyk, ek het nie eers ‘n boep soos ander mans van my ouderdom nie.  Dis die fietsryery wat my so fiks en jonk en gesond hou,” lag hy.

Melvin se daaglikse fietsritte deur Wellington se strate het egter ook al ‘n paar uitdagings en struikelblokke opgelewer.

“Kyk, laat ons nou eerlik wees.  Honde is ‘n posman se grootste vyand.  Niemand weet wát dit met honde en posmanne is nie.  In enige buurt, maak nie saak aan watter kant van die dorp dit is nie, hou ‘n hond eenvoudig net nie van ‘n posman nie.  Ek is sommer al op my heel eerste dag as posman, 46 jaar gelede, deur ‘n hond gebyt,” vertel Melvin met groot oë.

Hy wys ook ‘n seerplek aan sy hand wat hy die vorige week opgedoen het toe ‘n hond hom bestorm het en hy van sy fiets afgeval het.  Melvin se gevaarlike ontmoetings met Wellington se brakke het hom gelukkig nooit laat voel of hy wil tou opgooi nie.

“Dit is maar deel van ‘n posman se lewe,” sê hy filosofies. ‘n Ander uitdaging waarmee hy gedurende die afgelope 46 jaar talle kere te doen gekry het, is ‘n pap wiel.

“Ek ry al 46 jaar lank fiets en ek kry al vir 46 jaar lank pap wiele, maar ek kan nog steeds nie ‘n wiel self "patch" nie.  Ek stoot maar die fiets as ek ‘n pap wiel het en dan kom vra ek iemand hier by die poskantoor om dit vir my reg te maak.  Dis nou een ding wat ek nie kan doen nie,” lag Melvin verleë.

Slegte weerstoestande het hom nog nooit van stryk gebring as hy moes pos aflewer nie.  Volgens Melvin is hy gewoond daaraan om in sterk wind en reën op sy fiets pos af te lewer.

“’n Mens sukkel net partykeer in die reën om die pos droog te hou,” sê hy.

Melvin sê dat hy die poskantoor, sy kollegas en sy werk gaan mis.

“As ek op 30 April die laaste brief in die laaste posbus gooi en by die laaste stopstraat kom, gaan ek hartseer wees,” sê hy.

Hy beplan om lekker te gaan stap en in die tuin te werk wanneer hy die tuig by die poskantoor neerlê.

“Ek is baie dankbaar vir my ouers, twee broers, 5 susters en hele familie wat my die afgelope 46 jaar ondersteun het.  Ook Edward en my kollegas het my altyd bemoedig.  Wellington se mense en gemeenskap was altyd vriendelik en het my oor die jare ondersteun.  Dit maak my baie dankbaar,” sê Melvin voordat hy verder sy pos gaan sorteer en sy valhelm en fiets gaan regkry om die mense se pos vir hulle bring.

Guardians for the Valley open tuiste vir gemeenskap

Bo: Natasha saam met lede van Guardians for the Valley en verteenwoordigers van gemeenskaps- en regeringsorganisasies.

•Jaomi Zeeman

Die gemeenskapsorganisasie Guardians for the Valley, onder leiding van Natasha Downe, het op Saterdag 13 April ‘n inwydingsgeleentheid vir ‘n nuwe tuiste wat hul tot die gemeenskap beskikbaar stel, gehou.

Hierdie geleentheid het Spinstraat 2, die plek waar hierdie gemeenskapstuiste gesetel sal wees, in Wellington plaasgevind.

Natasha Downe, gemeenskapsaktivis en stigter van Guardians for the Valley, het tydens die openingsgeleentheid klem gelê op die belangrikheid van samewerking onder gemeenskapslede om probleme rondom hulle aan te spreek.

“Dit help nie mense leef elkeen in hul eie hoekie en hou hul meer besig met negatiewe praatjies as met samewerking nie.

"Ons gemeenskap is besig om onsself te laat ondergaan omdat ons niks doen om ons situasie te verbeter nie.  Om te kla, bring nie verbetering nie - net samewerking kan dit bewerkstellig,” het sy gesê.

Die eiendom wat Guardians for the Valley tot die gemeenskap se beskikking stel, is die Naidoo familie-eiendom wat al vir bykans sewe generasies in Natasha se familie se besit is.

“Ons visie vir hierdie plek is dat dit ‘n heenkome vir almal uit die gemeenskap sal word, ‘n plek waar mense aan ons gemeenskap kan bou.

"Hier gaan ‘n organiese groentetuin aangelê word, ‘n voedingskema bedryf word en ‘n crèche geopen word.

"Dit sal ‘n plek wees waar kinders smiddae onder toesig kan kom huiswerk doen en waar bejaardes oor ‘n koppie tee kan kom kuier.

"Ons gaan ook ‘n ou karavaan in ‘n mobiele biblioteek vir die gemeenskap omskep.  Opvoeding en sosiale ontwikkeling is ons hooffokus,” het Natasha gesê.

Sy het ook gemeenskapslede met kundigheid genooi om hul dienste by die huis te kom aanbied en almal bedank wat saamwerk om hierdie inisiatief moontlik te maak.

“My wens is dat ons respek terugbring - vir onsself, vir ons voorgeslagte en vir ons ou mense en dat ons dit by ons jongmense inskerp,” het Natasha gesê.

Talle gemeenskapsleiers, verteenwoordigers van gemeenskapsorganisasies en die munisipaliteit het die geleentheid bygewoon.

Springkastele, lewendige musiek en heerlike worsbroodjies het die werk wat by hierdie gemeenskapstuiste gedoen sal word op feestelike wyse ingelui.

Lisensies voortaan elektronies hernu

Voertuigeienaars in Drakenstein kan nou hul lisensies vir hul voertuie in die gerief van hul eie huise hernu en minder tyd in lang rye deurbring.

Die Drakenstein munisipaliteit het sedert 1 April 2019 ‘n suksesvolle nuwe stelsel geïmplementeer waarvolgens motorlisensies elektronies hernu kan word.

Wanneer die lisensieskyfie gereed is, kan die eienaar dit by die Munisipaliteit gaan optel.

Hoe werk hierdie nuwe sisteem?

Voertuigeienaars kan die http://www.drakenstein.gov.za/electronic-motor-vehicle-license-renewal webtuiste besoek, die maklike stappe volg en die munisipaliteit aangaande enige vrae kontak.

Hoe werk betaling vir hernuwing van ‘n voertuiglisensie?

‘n Direkte elektroniese bankbetaling word aan die volgende rekening gemaak:

Rekeningnaam:  Motor Vehicle Licensing

Rekeningnommer: 62804637570

Bank: FNB (First National Bank)

Takkode: 200110

Verwysing: Voertuig se registrasienommer

Dit is belangrik om daarop te let dat hierdie rekening slegs vir die betaling van voertuiglisensies is.

Kan betalings via die webtuiste gemaak word?

Nee, ‘n direkte elektroniese bankbetaling moet gemaak word.

Hoe kan ek my lisensieskyfie bekom?

Sodra die lisensieskyfie gereed is, kan dit by die Drakenstein Verkeersdienste se kantoor in Bergrivier Boulevard afgehaal word.

Hoe weet ek wanneer my lisensieskyfie gereed is?

Die munisipaliteit sal jou via telefoon of per e-pos in kennis stel.

Kan ek ‘n verkeersboete aanlyn betaal?

‘n Direkte elektroniese bankbetaling kan ook as ‘n betalingsmetode vir ‘n verkeersboete gebruik word.

‘n Betaling hiervoor kan aan die volgende rekening gemaak word:

Rekeningnaam:  Drakenstein Municipality

Rekeningnommer: 62071526514

Bank: FNB (First National Bank)

Takkode: 250655

Verwysing:  Jou kennisgewing se volledige nommer

‘n Bewys van betaling moet na trafficfines@drakenstein.gov.za ge-e-pos word.

Vir navrae kan 021 807 7741 of 021 872 0601 geskakel word.

Kan ek aanlyn ‘n afspraak vir my leerlinglisensie maak?

Nee.

Om ‘n afspraak vir jou leerlinglisensie te maak, moet jy enige van die Verkeersdienssentrums in die Drakenstein besoek.

Wie kan in die geval van ‘n navraag gekontak word?

Debmarie Liedeman kan by 021 807 7738 of onlinerenewals@drakenstein.gov.za in die geval van ‘n navraag gekontak word.

ATKV reël toer na Sutherland

Die plaaslike ATKV-gesinstak is besig om weer ‘n toer na Sutherland te organiseer.  Hierdie toer is een van die ATKV se jaarlikse projekte wat baie gewild onder lede en ondersteuners is.  Dit is reeds die afgelope 16 jaar ‘n instelling dat Wellington se ATKV-tak ‘n bus vol mense op ‘n heerlike toer neem om in Sutherland te gaan sterre kyk.

Tydens dié toer vertel die bekende Wellingtonner en sterrekundige, Willie Koorts, meer oor die hemelruim en die geskiedenis van die area waardeur daar gereis word.  Willie is ‘n elektroniese tegnikus by die Nasionale Sterrewag se hoofkantoor in Kaapstad en ook ‘n gereelde spreker op RSG se program, Sterre en Planete.  Die Kaapstadse Sterrewag is in 1820 gestig en is die oudste wetenskaplike instelling in Suid-Afrika.

Willie se liefde vir die sterrehemel het op Sutherland begin, waar hy een nag uitgeroep is om ‘n tegniese fout aan die teleskoop te herstel.  Die oomblik wat hy Saturnus amper lewensgroot deur die teleskoop waargeneem het, was hy verslaaf.

‘n Interessante feit is dat met die opening van die Seminarium in Wellington in dr. Andrew Murray se tyd, een van die onderwyseresse wat aangestel is, Anna Park Ferguson was.  Sy was een van die afgestudeerdes van Mount Holyoke in Massachusetts.  Sy was ‘n ywerige amateur-sterrekundige en het in 1882 ‘n sterrewag opgerig op die gronde van die ou “White House” op die terrein van die huidige Huis Wouter Malan.

1882 was ‘n besonderse jaar in astronomiese terme.  Eerstens het die “Groot Komeet van 1882” so helder geword dat dit selfs in die dag sigbaar was.  Tweedens het die oorgang van Venus in Desember 1882 plaasgevind.  Dit is op 6 Desember waargeneem vanaf die Seminarium se sterrewag en mej. Ferguson, Cummings en Brown kon hul eie observasies opteken.

Die oorgang van Venus vind slegs plaas wanneer die Aarde en Venus hulle gelyktydig aan dieselfde kant van die Son waar die bane kruis, bevind.

In 2004 kon Willie Koorts hierdie rare verskynsel waarneem vanaf naastenby dieselfde plek waar dit deur die Seminarium dames waargeneem is.  Hierdie tipe oorgang vind slegs min of meer 100 jaar uitmekaar plaas.

Die ATKV-tak se toer na Sutherland sal hierdie jaar op 11 en 12 Augustus onderneem word.  Willie Koorts sal oudergewoonte weer as die toerleier optree.  Die toer sluit ook ‘n draai by die geskiedkundige Matjiesfontein in.

Vir verdere besonderhede, kan belangstellendes Jenny Hanekom by 0787652638 of per epos na Jennyhanekom2@gmail.com kontak.

Die kostes sluit busvervoer, verblyf, toegang tot die Sterrewag en ook etes in.  Volgens die organiseerders is dit iets wat beslis nie misgeloop kan word nie.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.