Wellington
Terug na hoofblad

Silwer medalje vir Johan by Afrika-byeenkoms

Wellington se fietsrygemeenskap het ‘n nuwe ster.  Die matrikulant Johan van Zyl het verlede week tydens die Afrika Kontinent-bergfietskampioenskappe in Namibië ‘n silwer medalje in die kategorie vir junior mans verower.

Johan het die wedren van ongeveer 22 kilometer in 1 uur en 55 sekondes klaargemaak. Hy was slegs 16 sekondes agter die wenner, Daniel van der Walt, ook van Suid-Afrika, en drie sekondes voor die bronsmedaljewenner, spanmaat Tristan Nortje.

Bergfietsryers van agt Afrikalande het aan die byeenkoms deelgeneem.  Naas Suid-Afrika het fietsryers van Lesotho, Botswana, die Ivoorkus, Swaziland, Namibië, Zambië en Mauritius ook hul lande by die byeenkoms verteenwoordig.

Suid-Afrika het ‘n span van 25 ryers na die Afrika-byeenkoms in Windhoek gestuur. Johan, ‘n matrikulant van Hoër Tegniese Skool Drostdy op Worcester, het in Februarie vir die nasionale span gekwalifiseer, nadat hy die speke behoorlik laat sing het by die eerste twee bene van vanjaar se SA Cup in Durbanville.

Dit was egter so amper dat hy nie die groen-en-goud licra van die Suid-Afrikaanse bergfietsryspan vir die eerste keer oor sy kop kon trek nie.

Johan het op 7 Maart geval en sy pols gebreek terwyl hy op sy skool se bergfietsbaan geoefen het. Maar ken jy ‘n Van Zyl.

Johan het ‘n spesiale gewrigstut aangeskaf, en vir die volgende paar weke volstoom voortgegaan met sy oefenprogram ter voorbereiding van die multinasionale byeenkoms.

“Nee wat, dit het my nie gepla nie,” het hy na afloop daarvan aan Die Courant vertel.

Nadat Johan sy podiumplek by die Afrika byeenkoms losgery het, het sy afrigter, Ben Capostagno, die X-straal plaat van Johan se gebreekte pols op Facebook gedeel en so oor Johan geskryf: “Hy het pligsgetrou sy oefenprogram voorgesit ten spyte van die nuwe uitdaging, en is vyf weke later met ‘n silwer medalje beloon. Partykeer ervaar ons terugslae, maar met ‘n paar aanpassings kan mens steeds vorentoe beweeg.”

Capostagno het afgesluit met: “Geluk, Johan, en dankie vir die les.”

Capostagno rig Johan al sedert 2018 af. Sy oefenprogram sluit minstens twaalf ure in die saal per week in.

Soos die meeste seuns, was Johan van kleins af al gemaklik op ‘n fiets. Hy is op Vredendal gebore, en het sy laerskoolloopbaan aan Laerskool Hugenote voltooi, nadat sy ouers Wellington toe getrek het.

Hy het in alle erns begin oefen toe hy in Graad 8 na die Hoër Tegniese Skool Drostdy is, waar bergfietsry as skoolsport aangebied word. Sedertdien is hy oor naweke ‘n gereelde gesig op die bergfietsroetes en grondpaaie rondom Wellington, toegewyd en doelgerig aan die oefen vir kompetisies.

“Ek geniet dit om in die buitelug te wees,” vertel Johan oor sy liefde vir dié sport.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.