WDM lewer diens ‘te midde van unieke finansiële uitdagings’
Persverklaring
Die uitvoerende burgemeester van die Weskus Distriksmunisipaliteit, raadsheer Boffie Strydom, het tydens sy begrotingstoespraak verwys na die unieke finansiële uitdagings wat distriksmunisipaliteite in die gesig staar. Dit sluit “die afwesigheid van ’n eie inkomstestroom en verskeie ongefinansierde mandate in”.
So sê die WDM in ‘n persverklaring.
Die WDM se nuwe bedryfsbegroting vir 2025/26 dui op ‘n begrote surplus van R537 020 met bedryfsuitgawes ten bedrae van R609,03 miljoen en ‘n inkomste van R609,57 miljoen.
Die kapitaalprojekte sluit onder meer grootmaatwatervoorsiening van R3 miljoen en infrastruktuurontwikkeling van R12,34 miljoen in.
Die WDM het dié begroting ter tafel gelê ten spyte van aanhoudende ekonomiese uitdagings en beperkings op plaaslike regeringsvlak, aldus die persverklaring.
Tydens die begrotingsvergadering het die munisipale bestuurder, David Joubert, sy finansiële departement onder leiding van dr. Johan Tesselaar, geloof vir hul “uitmuntende werk om ’n realistiese en volhoubare begroting op te stel.”
Strydom het sy vertroue uitgespreek in die begroting se vermoë om die munisipaliteit se kernprioriteite en diensverpligtinge na te kom.
“Speaker, ek wil alle raadslede bedank vir hul samewerking tydens die opstel van hierdie begroting.
“U kan verseker wees dat ek as uitvoerende burgemeester my volle samewerking sal gee om volhoubare en verbeterde dienslewering aan al ons gemeenskappe in die Weskus te verseker.”
Die WDM se volgehoue sukses word ook weerspieël in hul 14de opeenvolgende skoon ouditverslag – ’n bewys van behoorlike finansiële bestuur en nakoming van regulatoriese voorskrifte. Die munisipaliteit het onder andere ’n nuwe streekstortingsterrein in die Matzikama-gebied voltooi en bestuur ook namens plaaslike munisipaliteite die enigste waterkonsessie op distriksvlak in Suid-Afrika.
Dié munisipaliteit is ook een van slegs twee distriksmunisipaliteite in die Wes-Kaap wat deur die provinsiale regering gekies is om ’n nuwe diensleweringmodel vir padkonstruksie en -onderhoud te toets – ’n verdere bevestiging van WDM se rol as toonaangewende padagentskap, lui die verklaring.