Malmesbury Skaapstudiegroep vereer weer top-kuddes

Die kuddes van lede van die skaapstudiegroep van Agri Malmesbury is vanjaar weer beoordeel en die wenners het hul toekennings tydens die 44ste jaarlikse kuddedag op die Malmesbury Skougronde ontvang.

In die Merino-afdeling het Janneman Louw met die eerste plek die Merinotelersgenootskapwisseltrofee ingepalm. Elandsberg Plase was in die tweede plek en Stevie Hamman derde. Die prys vir die beste wol (BKB-wisseltrofee) is toegeken aan Elandsberg Plase met Nicol Mostert wat die toekennings vir die beste GDT (gemiddelde daaglikse toename) asook die Callie van der Merwe-wisseltrofee vir die beste jongooi ontvang het.

Caledonville Plase het in die Dohne Merino-afdeling met die louere weggestap en daarvoor die Dohne Telersgenootskap-wisseltrofee ontvang. Groot Phesantekraal was tweede en Oubasie Lesch het die derde prys ontvang. Die pryse vir beide die beste wol (BKB-wisseltrofee) en die beste bouvorm is ook aan Caledonville Plase toegeken.

In die afdeling vir SA Vleismerino’s het Danie van Breda die eerste prys (SAV Telersgenootskap-wisseltrofee) verower, gevolg deur Michiel Smuts (2de) en Martin Bester (3de). Beide die pryse vir die beste wol en die beste bouvorm is ook aan Danie van Breda toegeken.

Nicol Mostert het vanjaar die Rumevite/Kaapstad Lewendehawe Agentskap-trofee vir die beste vordering oor alle rasse ontvang.

In die slaglamkompetisie het ‘n inskrywing van Johnny Forbes (Vredesig Boerdery) aan hom die Vleissentraal-wisseltrofee vir die Kampioenslaglam besorg. Ewan Louw (Nuweland) het die Reserwekampioen in dié afdeling ingeskryf terwyl Forbes ook die derde plek ingepalm het.

Forbes het ook die Kaapstad Lewende Hawe-wisseltrofee vir die kampioengroep ontvang en ook die reserwekampioengroep ingeskryf.

Onder die skoliere wat die dag se lesings bygewoon het, het Phillip Viljoen van Hoërskool Porterville die AgriExpo-prys vir die deelnemer met die meeste passie en leergierigheid ontvang.

Benjamin Turner van Augsburg Landbougimnasium is as die Stockman van die Jaar aangewys. Stefan Naude van Hoërskool Porterville was tweede, gevolg deur Hanri Cloete (3de) van Hoërskool Stellenbosch, Danie Kraft (4de) van Augsburg en Christie Kotze (5de) van Porterville.