Oukloof gedenk; veilige ruimtes geloods
Saam met die viering van Versoeningsdag het inwoners van Riebeek-Kasteel gisteraand ‘n nuwe gedenkmuur en skaalmodel ter herdenking van Oukloof onthul.
Oukloof is die woonbuurt van waar inwoners in die 60’s gedwonge verskuif is na die buurt wat later as Esterhof bekend geword het. Dié woonbuurt word ook nou Kasteel-Oos genoem.
Een van die groot dryfvere agter die Nuwekloof-projek om ‘n meer inklusiewe, geïntegreerde gemeenskap te bevorder, Roger Roman, het ‘n pleidooi op almal gedoen om respek.
“Ons moet respek hê vir mekaar. Vir die Ouklowers, vir die kinders vir almal. As ons almal mekaar met respek hanteer, het ons al ver gevorder.”
Die amptelike uitgangspunt van die Nuwekloofprojek is: Nuwekloof werk nie vir die gemeenskap nie. Nuwekloof is die gemeenskap wat vir homself werk.
Die muurskildery by die Meiring primêre skool is deur 16 kinders geverf en is ‘n onthou van die Ou Kloof-gemeenskap. Die skilpad op die muur het vir baie ‘n simbool geword van mense wat as’t ware hul huise op hul rug moes dra. Sprekers by die geleentheid het ‘n beroep gedoen op inwoners om, die verlede te spyt, te versoen oor grense heen en saam ‘n beter toekoms te bou.
By die geleentheid was daar ook ‘n roerende onthulling van ‘n model van Oukloof wat deur ‘n Ouklower Andries Koopman gebou is. Koopman was vroeër jare ‘n kontrakteur en het vertel van die ure se werk en ook die emosionele tye wat hy beleef het om dié woonbuurt met die model te laat herleef.
Van die oorblywende inwoners van die destydse Oukloof het by die model roerend geïdentifiseer met die betrokke huis waarin hulle as kind gewoon het.
Daar was vertel van misvloere en groentetuine en veilige strate waar die kinders kon speel.
‘n Nuwe inisitief van veilige ruimtes is ook gisteraand van stapel gestuur.
Dit het ten doel om as ‘n loodsprojek met die hulp van vrywillige gemeenskapslede veilige ruimtes te skep.
Die eerste drie veilige ruimtes is die terrein van Meiring primêre skool, die grond om die klein winkelkompleks asook die POP-sentrum.
Faiza Davids, regshulpraktisyn by Nuwekloof, het gesê daar word beoog om die veilige ruimtes later na naburige dorpe in die streek uit te brei.