Crous oes louere met ‘Family Time’
Beoordelaar David Barnes het op die Swartland Fotografieklub se maandvergadering die inskrywing Family Time van Ciszanne Crous van Piketberg as die algehele wenner aangewys.
Crous se foto wat ook die ope afdeling vir kleurfoto’s en dié vir junior fotograwe gewen het, het ‘n werk Mesmerized 2 van Herman Olivier van Malmesbury met ‘n kortkop geklop. Laasgenoemde foto was die wenner in die ope afdeling vir monokrome foto’s asook die senior wenner. Barnes het aan beide foto’s 28 uit die moontlike 30 punte toegeken.
Die ander wenners van die aand was Olivier se Bo-Kaap Beauty (gedrukte foto’s), Crous se Silence before the storm (selfoonfoto’s) en Theuns Olivier van Tzaneen se Geurige bestanddele (temawenner). Die tema vir die maand was produk- en tafelbladfotografie.
Die klub se tema Mei is portretfotografie.
Vir dié tema het die klub ‘n uitstappie na die De Wet Wynkelder by Worcester onderneem. Die minikompetisie vir deelnemers is deur Adriaan Vlok van Malmesbury gewen met sy foto Pot of Gold.
Hier is die ander foto’s wat vandeesmaand 24 en meer uit die moontlike 30 punte gekry het.
Belangstellendes wat meer inligting oor die klub se bedrywighede wil bekom, kan die voorsitter, Peter Hardcastle, kontak by 083 628 9668.