Swartlander onder nuwe Kaapse Wynmeesters
Die Instituut van Kaapse Wynmeesters het pas vier nuwe wynmeesters toegelaat. Riaan van der Spuy, keldermeester van die Swartland Wynkelder, is een van hulle.
Van der Spuy het in 1997 by Elsenburg gegradueer. Ná sy studies het hy internasionale wynmaakgeleenthede in Bordeaux (Frankryk), Napa en Sonoma (VSA) en streke in Suid-Amerika gekry. Dit het sy kennis van beide ou- en nuwewêreldse wynmaaktegnieke verbreed.
Sedert 2016 is hy keldermeester by Swartland Wynkelder. Sy internasionale ervaring beïnvloed Van der Spuy se benadering tot die maak van wyne wat uitdrukking gee aan die Swartland se uiteenlopende terroirs en Mediterreense klimaat.
Sy bydrae strek ook wyer in die breër Suid-Afrikaanse wynbedryf, onder meer as beoordelaar by die Michelangelo Internasionale Wyn- en Spiritualieë-toekennings.
As een van die vereistes om as wynmeesters te kwalifeer, moes hy ‘n navorsingsartikel skryf.
Die onderwerp van sy navorsing was die verbouing van wyndruiwe op hoë liggings in Suid-Afrika. Dit weerspieël ook sy belangstelling in die tegniese uitdagings van dié wingerdbou.
Van der Spuy sal op 10 September oor sy navorsing ‘n voorlegging doen by vanjaar se Cape Wine in die Kaapstad Internasionale Konvensiestrum.
Die navorsingsartikel bied ‘n gedetailleerde oorsig van hoë-hoogte wingerdbou, met besondere fokus op die relevansie en potensiaal daarvan vir Suid-Afrika.
Deur gebruik te maak van beide literatuur en insigte van ervare wynprodusente, analiseer hy die klimaatsinvloede van hoogte, soos laer temperature, groter daaglikse temperatuurvariasie en verhoogde sonstraling op wingerdfisiologie en druifkwaliteit. Hierdie faktore kan aromatiese intensiteit, suurheidsbehoud en fenoliese ontwikkeling verbeter, maar dit bied ook noemenswaardige uitdagings, insluitend ryprisiko, korter groeiseisoene en logistieke probleme in wingerdbestuur.
Hy ondersoek verder hoe hoër hoogtes die chemiese en fisiese eienskappe van druiwe beïnvloed, wat moontlik kan lei tot wyne met ‘n kenmerkende struktuur, varsheid en verouderingspotensiaal.
Van der Spuy kom dan tot die gevolgtrekking dat, terwyl wingerdbou op hoë hoogtes in Suid-Afrika agronomiese en logistieke uitdagings bied, die voordele – wat wissel van premium markposisionering tot toerisme en werkskepping – aansienlik kan bydra tot groei en innovasie binne die land se wynbedryf.
Hier is ‘n skakel na Van der Spuy se navorsingtuk.